Tangis Sungsut Maduluran Suaran Angklung

DENPASAR, DiariBali
mabusana antuk jakét selem, IGB Arthanegara kantun kukuh égar nyanggra sapetedun ngrauhin ring Krematorium Santanaya, Jalan Cekomaria, Peguyangan Kangin, Denpasar. Tata wedananyané sané kakantenang ucem ngawedarang daging rasa sungsut tanda kelayusekaran.

Parajana sané rauh dinané punika, Sukra Paing Pahang 21 Mei 2021 nénten pepegatan saking semeng ngantos siang. Duaning, pengrajeg pendidikan, Arthanegara madérbe prakanti sané jimbar. Dané 77 warsa punika sareng pesemetonan sané akéhan akademisi Universitas Mahadéwa Indonesia.

Penerapan protokol keséhatan sané ketat nampisin penularan Covid-19, punika mawinan Arthanegara nerima pelayat saking sisi pagehan krematorium. Indiké punika kamargiang kabaksa mangda nénten mapupul. Ring genah krematorium wantah nénten langkung saking 25 diri. Angga Poi Gwan Nio sané kadilap olih api sané katinggal antuk pangrarab saking pelayat.

Petugas kremasi jangkep antuk kartu pengenal sané nglayut ring baong ipun ngenampekin. “ Tu aji durus ngranjing,” aturnyané petugas. Kawéntenan punika, Poi Gwan Nio sàmpun dados awu lan sayaga jagi karéka. Ngréka inggih punika nyangkepang mawali galih –galih angga sarira rikala pangesengan layon puput. Pinaka aji, Arthanegara janten nampingin, ngupasaksi saha nyarengin ngréka puing galih istri sané dahat sutresna.

Cokor renta Arthanegara nabdabang pamargi sada alon ngranjing ka kremasi manut pangapti petugas punika. Rikala nglimpasin pagehan utama mandala, pamargi alon dané sada macandet nepas ring genah angklung sané gargita nabuhang paletan-paletan daun bilah. Nanging, malih apisan nénten masunar rasa duka ring prabawanyané.

Galahé punika kaanggén olih makudang media nunas statement utawi baos pamargi kelayusekaran istri sané pinih sutresna. Istri sané ngamijilang I Gusti Ayu Mas Sri Apsari lan I Gusti Bagus Dharmaputra, buah ati dané.

“Istri titiang keni pinungkan jantung, sané ngrangsuk ke ginjal, asam lambung. Komplikasi kabaosang,” baos Ketua YPLP PT IKIP PGRI Bali puniki.

Saking kulawarga, baos Arthanegara, sampun makudang pidabdab sané pinih utama lan becik istri sané magentos parab dados Nyoman Meilly Yumaningsih punika.

Istri sané nampingin rikala suka duka salami 54 warsa puniki nglepasang prana panguntat ring rumah sakit swasta ring kota Dénpasar, Anggara Wagé Pahang 18 mei 2021. Pamargi sané ngranayang sungsut ring kauripan Arthanegara memargi gelis lan antar. “Ida Sang Hyang Widhi Wasa pinih sutresna ring istri tiang. Baosnyané.

Ring kewéntenan kahanan duka punika, Arthanegara kantun prasida nyritayang sejarah patemon sareng Meilly, Istri listuayu saking Tionghoa magenah ring Payangan, Gianyar.

Duk 1960-an, Arthanegara yowana inggih punika mahasiswa saking Bali sané berpréstasi. Indayang, warsa punika sampun ngalintangin béasiswa ke negeri Tirai Bambu, China.

Ring panegara antuk penduduk pinih padet ring mancanegara, Arthanegara ngrereh kaweruhan ngantos warsa ke warsa. Rikala mawali ke Bali, dané ngemban tugas sané utama pinaka sumber informasi indik China majeng para yowana Bali. Yéning warsané punika sampun wénten “ Mbah Google”, majanten dané katinggal galah.

Akulturasi kabudayan China sareng Bali sampun kamargiang ngawit 2.200 warsa. Antuk punika patut kasayagayang ring péntas seni mangda prasida ngiket para penonton. Duaning, Arthanegara maparidabdab ngwangun Drama Sampik Ing Tai.

Rikanjekan soré, sadurung pentas kalaksanayang, dané nyelahang galah simpang ke pondok wargi Tionghoa ring Payangan. “ Titiang simpang ke silih tunggil pacanggahan, panguntat matemu sareng Meilly, Anak istri sané listuayu. Titiang kedaut saha ngiket tresna,” kenangnyané.

Durung puput nyritayang, yéh panon neres saking penyingakan Arthanegara. Tungtung tangis ngawit buncah sada bengul kaselisir antuk suaran gambelan angklung ring Krematorium Santayana.

Kepagehan sané katiwakang Arthanegara wantah guyonan. Dané nutupin kayun sané lebur antuk gegonjakan. Dané nénten kayun nyaksiang sungsut sané karasayang.

Dané nénten kayun nyarengin ngréka kenangan rikala nyangkepang rasa sutresna majeng istrinyané sané kajantenang sah ring upacara pawiwahan warsa 1976.

Tata cara magegélan galah punika, janten matiosan sakadi mangkin. Sauningnyané, budaya surat anyurat kantun pinih let. Makawénten dané nyelahang galah malam minggu antuk nonton pentas kesenian ngantos malancaran ke taman kota.

Sapaninggal sang istri, Arthanegara makayun “move one” nglanturang pakaryan pinaka pengayah parajana ring widang pendidikan. “ yéning 45 warsa sané lintang titiang ngawit kauripan sané anyar pinaka pakurenan, nanging sané mangkin ngawitin kauripan sané anyar dados jadma walu. Baos Arthanegara nguntatin. Tim