Wawali Denpasar Upasaksi Upacara Ngenteg Linggih Pura Dalem Wirasana
“Upakara ngenteg linggih ring pura Dalem Wirasana kaupasaksi olih Wawali Denpasar pikukuh nincapang srada bakti majeng ring Ida Sang Hyang Widhi Wasa”
DENPASAR – DiariBali
Upacara Karya Ngenteg Linggih, Mlaspas, Mendem Pedagingan, Caru Panca Rupa lan Padudusan Alit ring Pura Dalem Wirasana, Banjar Biaung, Desa Adat Kesiman, Denpasar, Buda Umanis Tambir (9/6/2021) Wakil Walikota Dènpasar, I Kadèk Agus Arya Wibawa ngupasaksi pamargi upacara lan pujawali sanè kasarengin Anggota DPRD Kota Dènpasar, I Wayan Warka, Sekcam Dentim, I Madè Tirana lan uleman tiosan.
Wakil Walikota Dènpasar, I Kadèk Agus Arya Wibawa maosang Karya Ngenteg Linggih, Mlaspas, Mendem Pedagingan, Caru Panca Rupa lan Padudusan Alit ring Pura Dalem Wirasana, Banjar Biaung puniki mangda kadadosang olih masyarakat setata ngrajegang kadegdegan lan kelanduhan jagat luir ipun Parhyangan, Palemahan, lan Pawongan pinaka pikukuh ajahan Tri Hita Karana.
“Indik pamargi upacara lan upakara puniki
ngiring iraga sareng-sareng nincapang srada bakti majeng ring Ida Sang Hyang Widhi Wasa antuk ngukuhang saha nglimbakang rasa ayubagia lan kasutreptian ring kauripan pinaka implementasi Tri Hita Karana,” baos Wawalu Kadek Agus.
Tios punika Prawartaka Karya I Wayan Sada ngawedarang wit pawangunan ring tata parhyangan pura Dalem Wirasana, banjar Biaung sampun kakawitin saking warsa 2016 lan puncak karya kamargiang rahinanè mangkin 9 juni. Nyinen karya ring pinanggal 12 juni sanè jagi rauh.
Pamargi karya kapuput olih Ida Pedanda Gede Ngurah Grya Tegeh Kesiman. “Majanten ring kawèntenan pikobet sakadi mangkin kahanan pandemi, sapengrauh bapak walikota dados panyokong lan doa restu majeng krama iriki sanè nangun yadnya kadasarin antuk manah lascarya. Tios ring punika indik pamargi upacara tetep sanè utama nguratiang protokol kesèhatan sanè ketat mangda i krama kenak rahayu,” pajar Sada. (Get)
