Bhakti Penganyar Pemkot Denpasar ring Pura Ulun Danu Batur

Bangli, diaribali.com
Pemerintah Kota Denpasar nglaksanayang Bhakti Penganyar Karya Pujawali Ngusaba Kedasa ring Pura Ulun Danu Batur rahina Wraspati Umanis Wuku Sinta, (9/4).

Pamargin Bhakti Penganyar punika kapimpin olih Wali Kota Denpasar, I Gusti Ngurah Jaya Negara kasarengin Wakil Wali Kota Denpasar, I Kadek Agus Arya Wibawa. Taler Ketua DPRD Kota Denpasar, I Gusti Ngurah Gede beserta, Wakil Ketua DPRD Kota Denpasar I Made Oka Cahyadi Wiguna miwah anggota, Anggota DPRD Provinsi Bali, I Gusti Ngurah Gede Marhaendra Jaya, saha pimpinan OPD ring baga Pemkot Denpasar.

Tiosan punika, taler nyarengin Ketua TP PKK Kota Denpasar, Ny. Sagung Antari Jaya Negara, Ketua GOW Kota Denpasar Ny. Ayu Kristi Arya Wibawa, Ketua Gatriwara Kota Denpasar Ny. Purnawati Ngurah Gede, miwah Ketua DWP Kota Denpasar Ny. Swandewi Eddy Mulya.

Matepatan Puncak Karya ring rahina Purnama Kedasa tanggal 2 April, Pura Ulun Danu Batur akeh para pemedek sane nangkil ngaturang pangrastiti bhakti. Pamargi Bhakti Penganyar Pemkot Denpasar kariinin pangilen Tari Topeng Paseban saking Banjar Abian Kapas Kaja, kalanturang Tari Rejang sane kasolahang olih WHDI Kota Denpasar, DWP Kota Denpasar, PHDI Kota Denpasar miwah staf Bagian Kesra Kota Denpasar.

Kahanan sayuakti dahat ngulangunin antuk lantunan pesantian olih Sekaa Santi TPLAH Kota Denpasar saha iringan gambelan saking Sekaa Gong Kesuma Jaya Banjar Abian Kapas Kaja. Parikrama panguntat kamargiang antuk pangrastiti bhakti sinarengan sane kapuput olih Ida Pedanda Gede Oka saking Griya Tegeh Karang Lumintang, taler kalanturang ngaturang bhakti punia.

Wali Kota Denpasar, I Gusti Ngurah Jaya Negara kasarengin Wakil Wali Kota I Kadek Agus Arya Wibawa maosang pamargi Bhakti Penganyar warsane mangkin prasida mamargi antar labdakarya manut pangapti.

“Upakara Bhakti Penganyar warsane mangkin prasida antar rahayu sida sidaning don,” baos dane.

Salanturnyane, Karya Pujawali Ngusaba Kedasa ring Pura Ulun Danu Batur pinaka momentum mikelingin umat Hindu manda satata nincapang sradha bhakti majeng ring Ida Sang Hyang Widhi Wasa. Tiosan punika, patirtan puniki pinaka galah mulat sarira gumanti jagat raya puniki mangguh sukerta santi.

“Ring galah sane dahating ayu puniki ngiring sareng-sareng nincapang sradha miwah bhakti nglungsur waranugraha majeng Ida Sang Hyang Widhi Wasa pamekas ida batara sane ngarcana ring pura Ulun Danu Batur,” baos dane.

Jaya Negara ngawewehin upakara Bhakti Penganyar puniki taler pinaka ngaluhurang pangayubagia Pemerintah Kota Denpasar duaning sampun kaicen karahayuan rikala ngamargiang swadarma miwah swagina ngwangun daerah.

“Semangat menyama braya mangda sayan rajeg, antuk punika yadnya pinaka dasar pangrastiti sane kaanggen patitis mapaiketan sesanti pawangunan Kota Denpasar miwah Spirit Vasudhaiva Kutumbakam,” weweh dane.

Tiosan punika, Pangemong Pura Ulun Danu Batur, Jero Gede Batur Duwuran maosang Puncak Karya Pujawali Ngusaba Kedasa sampun kamargiang duk tanggal 2 April 2026. Eedan penganyar kalaksanayang ngawit 3 ngantos 11 April sane jagi rauh sane kamiletin kabupaten/kota se-Bali, panyineban karya jagi kamargiang ring 12 April sane jagi rauh.

Dane mikelingin majeng umat Hindu sane jagi rauh tangkil saha ngaturang bhakti selami ida batara nyejer. Pangaptinnyane malarapan patirtan Pujawali Ngusaba Kedasa puniki, Ida Sang Hyang Widhi Wasa satata ngicenin karahayuan jagat miwah sukerta santi. (db)