Sapunapi Gatra Gedè Pasek Suardika?
KARANGASEM-DiariBali
Gedè Pasek Suardika wantah silih sinunggil putra wit Bali sanè sukses ring kancah politik nasional. Panguntat dané menjabat dados anggota dèwan Perwakilan Daérah (DPD RI) utawi Sènator periode 2014-2019.
Akéh rékor sané kapucehang, minakadi pinaka putra Bali pinih pertama sané mejabat Ketua Komisi III DPR RI, Ketua Badan Kehormatan (BK) DPD RI, Ketua Badan Urusan Legislasi Daérah (BULD), lan Ketua Panitia Pangrancana Undang-undang (PPPU).
Pikolih sané utama, dané sané kaloktah kasapa GPS puniki ngalinggihin jabatan pinaka Sekretaris Jéndral Partai Hanura.
Rikala éra GPS lan tetiga Sénator saking Bali puput, hasil pemilu 2019-2024 ngalolosang incumbent Gusti Ngurah Arya Wédakarna, I Madé Mangku Pastika, Anak Agung Gedé Agung lan Bambag Santoso pinaka wakil Bali ring DPD RI.
Nanging, menawita dané nénten seneng utawi lobynyané rered, parebutan kursi pimpinan ring DPD RI yukti-yukti manados patpat anggota DPD RI période 2019-2024 saking dapil Bali nénten masunar.
Panadosnyané pemilihan AKD lan makudang badan sané kasahang paripurna ring sidang paripurna ke-5 DPD RI, Bali nénten mikolihang genah kursi pimpinan.
Pikolih puniki dados catatan sané kaon sepanjang sejarah pamargi para sénator saking dapil Bali rikala 2004 dumun. Yadiastun Bali rikala punika nindihin RUU ( Rencana Undang-Undang) Révisi UU Nomor 64 warsa 1958 indik pembentukan provinsi Bali mangda prasida ngranjing program législasi nasional (prolégnas).
Nénten wénten kekuatan Bali rikala pimpinan badan utawi komité puniki manadosang kekuatan lobi lan jaringan sénator puniki kantun madué rasa sumania. Indiké punika silih sinunggil bukti wantah GPS sané madué taring ring Senayan.
Nggih, sané mangkin sapunapi swagina rikala nénten dados pejabat negara?
Kacunduk ring Astika Dharma Asrham, Banjar/Désa Pempatan,Kecamatan Rendang, Karangasem, nénten sué puniki, GPS kapanggih anyita kawéntenan sané anyar pinaka guru réka saking puluhan pianak.
Asrham utawi pasraman sané kawangun antuk pringet ngraga punika, sané mangkin sampun kawangun SMA maprewerti Hindu. Puluan alit-alit sané tiwas karanjingang irika gratis, kasiagayang pacanggahan lan sarana ajengan.
Kalih warsa sampun ngadeg, SMA sané kawagun sampun ngawit kapiragiang ngatos ke Nusantara. Mawinan, para sisya nénten malih mawit saking kabupatén/kota se-Bali, nanging para sisya saking provinsi lianan.
Sioan jam pelajaran formal, alit-alit kaajahin nelebang kebudayan Hindu Bali minakadi magegitan,magambel, ngingel, musik, olahraga, pertanian, miwah pakaryan positif lianan.
“Yening titiang wénten ring Bali, pastika titiang ke Asrham. Puniki wantah panglilacita,” baos GPS. Dané ngawedarang nénten peduli indik pituduh makudang pihak sane “mapituduh” ring Asrham dané mapenguruk aliran sampradaya. “ Sapa sira je mapituduh, durus rauh mriki,” wewehnyané.
GPS ngetélang pawecana, ngardi kalewihan parilaksana becik wantah Investasi karma. Sangkaning pengalamannyané ngrereh prakanti antuk makudang kelas sosial, ngawit jadma sané kalintang pinih sugih ngantos jadma sané pinih tiwas.
“Kauripan puniki sampunang makta kalkulator. Tugas jadma sami wantah makarya. Lan sedana utawi rejeki punika titah Ida Sang Hyang Widhi Wasa,” baos dané. Manut GPS, yéning cucud ngawantu anak tiosan manut sakasidan, punika pacang mapuara dangan ring kauripan.
Kanggén kaperluan beras kemanten sampun ngenampekin siki ton nyabran sasih. Yadiastun, dané ngankenin wénten makudang punia sané sayaga wirang ngawantu alit-alit dané.
Dané nénten mapengapti lan pamerih maka wénten alit-alit sané kaunggahang derajat antuk pendidikan, sakémaon pangaptinyané mangda riwekas dados jadma sané kukuh pageh, jujur, lan mandiri sakadi reraman guru réka ipun. Tim
