Mikukuhin Aksara Bali antuk Media Komputer
“Dèsa Dangin Puri Kaja ngamargiang pembinaan nyurat aksara Bali berbasis Bali Simbar pinaka pidabdab ngalestariang budaya lan mikukuhin basa lan aksara Bali”
DENPASAR-Diari Bali
Pinaka cihna ngalestariang budaya lan kasusastran budaya Bali desa Dangin Puri Kaja ngalaksanayang pembinaan nyurat aksara Bali antuk Bali Simbar berbasis komputer, Reditè Kliwon Medangkungan (13/6/2021) ring kantor Desa. Pamargi punika kamargiang pinaka nyokong saha mikukuhin palestarian basa lan aksara Bali.
Perbekel dèsa Dangin Puri Kaja AA Cahyadi maosang pamargi acara puniki kasarengin masyarakat dèsa Dangin Puri Kaja. Antuk pidabdab pembinaan nyurat aksara Bali manual punika kalaksanayang olih sisya sekolah dasar (SD), tios punika pembinaan aksara Bali ring komputer kabaos Bali Simbar majeng sisya sekolah menengah pertama ( SMP).
“Acara Bali Simbar pertama kamargiang ring kota Denpasar ring dèsa Dangin Puri Kaja sanè kawantu olih tim Penyuluh Bahasa Bali,” baosnyanè.
Ngurah Cahyadi ngawedarang acara puniki kamargiang boya je nènten tios matetujon mikukuhin minat belajar para sisya mangda uning kawèntenan saha waged ring aksara Bali. Tiosan punika, akehnyanè panglalah utawi panglimbak teknologi digitalisasi puniki kawèntenan punika mangda prasida nglanturan adaptasi sanè gelis. Indikè punika pamargi inucap taler prasida waged ring aplikasi Bali Simbar.
” iraga sareng sami pamekas alit – alit mangda sauninga aksara Bali ring media komputer saha prasida nerapang kawagedan ring kauripan sarahina, pikolihnyanè tiosan midep nyurat aksara, para yowana taler maderbe kawagedan digitalisasi naskah aksara Bali,” wedarnyanè.
“Danè mapangapti, majalaran pamargi acara puniki prasida kaduldul manah alit- alit mangda malajahin basa lan aksara Bali.
“Pangaptin titiang pembinaan puniki prasida ngawetuang pikolih sanè becik majeng ring masyarakat. Pamekas alit-alit sida nyurat aksara Bali lan prasida bersaing ngamolihang prèstasi ngenènin indik basa Bali ring sekolah utawi pamargi wimbakara sanè sering kalaksanayang, untengnyanè wantah ngalestariang saha ngalimbakang basa, sastra lan aksara Bali,” puputnyanè. (Get)
