Pemkot Denpasar Tirta Yatra Lansia Posyandu Paripurna
Gianyar, diaribali. com
Pemerintah Kota Denpasar makajalaran Dinas Pemberdayaan Masyarakat Desa (DPMD) kamiletin TP PKK Kota Denpasar nglaksanayang Tirta Yatra kasarengin penyatusan lansia Pemilet Posyandu Paripurna, saking patpat kecamatan, makadi Denpasar Barat, Denpasar Timur, miwah Denpasar Selatan ring Pura Tirta Empul, Tampaksiring, Gianyar, Wrespati Wage Wuku Tolu (13/3).
Parikrama inucap kasarengin olih Ketua GOW Kota Denpasar, Ny. Ayu Kristi Arya Wibawa, Sekretaris TP PKK Kota Denpasar, Ni Nyoman Sri Utari, jajaran DPMD Kota Denpasar, miwah pihak terkait lianan.
Kepala Dinas PMD Kota Denpasar I Wayan Budha nlatarang, Acara Tirta Yatra kalaksanayang Pemkot pinaka agenda Posysndu Paripurna sane kalaksanayang antuk Koordinasi Dinas PMD miwah TP PKK Kota Denpasar.
“Parikrama Tirta Yatra puniki kamargiang pinaka silih tunggil program ri sajeroning agenda Posyandu Paripurna kasarengin para lansia, ngaturang pangrastiti ngaluruhang rasa pangayubagia majeng ring Ida Sang Hyang Widhi Wasa sane sampun sueca ngamertanin iraga sareng sami,” atur Wayan Budha.
Tiosan punika, kekretaris TP PKK Kota Denpasar Ni Nyoman Sri Utari maosang TP PKK Kota Denpasar selami puniki sering ngamargiang parikrama Tirta Yatra antuk pamilet Posyandu Paripurna, indike puniki taler kaaptiang mangda prasida mikolihang kawigunan utamannyane majeng para lansia.
” Bo ya Ja para lansia kacunduk ri sajeroning parikrama Posyandu Paripurna, acara Tirta Yatra puniki taler prasida ngarumaketang paiketan miwah magendu wirasa majeng lansia, taler prasida ngamolihang panglila cita,” Baos Sri Utari.
Silih tunggil lansia Ni Nengah Rasmi nlatarang rasa pangayubagia prasida ngamiltin acara Tirta Yatra rahinane galahe mangkin. Manut ipun parikrama puniki tiosan nunas karahayuan taler prasida nunggilang pikayun majeng sesamen lansia Posyandu Paripurna.
“Yadiastun sering kapanggih rikala senam miwah posyandu, nanging galahe puniki dahat subagia . matur suksma Pemerintah Kota Denpasar miwah TP PKK Kota Denpasar. Dumogi program puniki seyan nincap miwah ngalimbak,” atur ipun (Get)