Wali Kota Jaya Negara Tedun Ngeratep miwah Pasupati Sesuhunan Pura Ratu Made Agung
Denpasar, diaribali.com
Wali Kota Denpasar, I Gusti Ngurah Jaya Negara ngrauhin Karya Ngeratep, Melaspas miwah Pasupati Sesuhunan ring Pura Ratu Made Agung, Desa Adat Penatih, Kecamatan Denpasar Timur, Buda Kliwon Wuku Gumbreg (19/3).
Upacara puniki nepak Rahinan Kajeng Kliwon, prasida kalaksanayang duaning sampun jangkep pamargi nangiang miwah ngodakin ida sesuhunan. Ring galahe sane becik punika, Wali Kota Jaya Negara taler nyumpangin sekar taler upakara pasupati ida sesuhunan ring Pura Ratu Madé Gung.
Ring galahé punika taler kasarengin, Kabag Kesra Sétda Kota Dénpasar, IB Alit Antara, Camat Denpasar Timur, Ketut Sri Karyawati, Bendésa Adat Penatih, I Wayan Eka Yana miwah uleman tiosan.
Mangala Prawartaka Karya, Made Oka Wibawa nlatarang, Karya Ngeratep, Melaspas lan Pasupati puniki wantah Nangiang miwah Ngodakin Ida Sesuhunan sane wenten ring Pura Ratu Made Agung. Sesuhunan sane kapasupati inggih punika Sesuhunan Ratu Made Agung, Ratu Batur miwah Ratu Hyang Api. “Sesampune prasida puput, kamargiang Upacara Ngeratep, Melaspas miwah Pasupati,” tlatar dane.
Maweweh kaaturang, sesampune upacara ngeratep, melaspas miwah pasupati, parikrama upacara kalanturang antuk Upacara Melasti. “majanten titiang pinaka Prawartaka ngaturang parama suksma antuk pangremba ida dane sami, majanten parikrama upacara puniki prasida mamargi antar, dumogi ida bhatara sesuhunan ngicenin kerahayuan miwah karahajengan ring iraga sareng sami,” pangaptinyane.
Ring galahe sane becik punika, Wali Kota Denpasar, I Gusti Ngurah Jaya Negara maosang, pamargi karya Ngeratep, Melaspas lan Pasupati Sesuhunan ring Pura Ratu Made Agung Denpasar puniki pinaka cihna majeng I krama mangda setata eling miwah nincapang srada bhakti majeng ring Ida Sang Hyang Widhi Wasa. Duaning sampun sepatutnyane makasami krama mangda nyihnayang kerti yasa rikalaning ngawerdiang kasuciane nganutin ajahan Tri Hita Karana makadi parahyangan, pawongan miwah palemahan.
“Antuk ngamargiang upacara puniki ngiring tincapang srada bhakti iraga sareng sami pinaka utsaha ngawerdiang ajahan Tri Hita Karana sakadi parhyangan, pawongan, miwah palemahan,” baos Jaya Negara (get)