Pemkot Denpasar Sayan Nincapang Infrastruktur

Denpasar, DiariBali.com
Pemerintah Kota Denpasar Walikota I Gusti Ngurah Jaya Negara miwah Wakil Walikota I Kadek Agus Arya Wibawa sayan nincapang infrastruktur perkotaan. Ring warsa 2025 puniki, mecikang margi kota, margi wewidangan, pawangunan jembatan, drainase miwah trotoarisasi wantah pidabdab utama. Tiosan punika, pawangunan lanturan Puskesmas Ibu miwah Anak ring Eks. Pasar Loak Jalan Gunung Agung taler ngranjing pawangunan kaping II miwah sampun karencanayang pacang kapungkah ring panguntat warsa 2025.
Kadis PUPR Kota Denpasar, AA Ngurah Bagus Airawata nlatarang ring warsa 2025 puniki Pemkot Denpasar madue makudang program prioritas ring widang infrastruktur. Indike puniki wantah midabdabin pangapti krama sane maiketan indik akses margi, trotoar miwah drainase sane pinih luwih. Wreaspati Pon Wuku Wayang (16/1).
“Patut ring warsa 2025 puniki wenten makudang program prioritas, makadi pawangunan lanturan Puskesmas Ibu miwah Anak ring Denpasar Barat, punika taler nincapang infrastruktur margi kota, margi wewidangan, taler ngamecikang trotoar majeng pajalan kaki saha mecikang drainase mangda optimalisasi pengendalian banjir,”baos dane.
Airawata taler maosang ngamecikakang margi karincikang manut kalih segmen utama sakadi rekontruksi miwah rehabilitasi. Makudang margi pacang karekontruksi inggih punika Jalan Tegal Dukuh, Jalan Tukad Irawadi, Jalan Tukad Melangit, Jalan Tukad Languan miwah Jalan Tukad Sanghyang, wewidangan Sekar Jepun, Jalan Kenyeri, Jalan Katerangan miwah Jalan Pucuk, Jalan Palapa, Jalan Teuku Umar Barat, Jalan Gunung Andakasa, Jalan Himalaya miwah Jalan Angsoka Selatan.
Indik rehabilitas margi pacang kaulengang makadi Jalan Pulau Misol, Jalan Tukad Badung, Jalan Gatot Subroto I, Jalan Suli, Jalan Satelit, Jalan Nakula, Jalan Arjuna, Jalan Abimanyu, Jalan Werkudara, Jalan Kartini, Jalan Padma miwah widang pariwisata jalan Danau Tamblingan Sanur. Tiosan punika, taler pacang kawangun kalih jembatan pangentos ring kawasan Jalan Kaswari miwah Danau Tempe.
Mangda prasida nincap infrastruktur margi ring kota puniki, DPUPR Kota Denpasar sampun nyiagayang prabea akehnyane Rp. 190 Miliar lintang. Tios ring punika infrastruktur margi kota, nincapang margi ring pantaraning wewidangan taler pacang kalaksanayang. Silih tunggilnyane pawangunan rumah singgah taler rumah binaan olih Sat Pol PP Kota Denpasar.
“Nincapang infrastruktur margi kota tetep dados pidabdab utama miwah wenten makudang margi sapisanan pawangunan drainase miwah trotoar, majanten kawekas margi sane dados kawenang Pemkot Denpasar prasida mawiguna karasayang becik, trepti manut pangapti,”baosnyane (hmd/get).