Dènpasar Ngamijilang Icon Anyar

I Nyoman Gede Sentana Putra (Kedux Garage) pinaka dèsainer patung rikala audènsi majeng Walikota Dènpasar I Gusti Ngurah Jaya Negara ring Kantor Walikota Dènpasar, Soma Paing Menail (5/7/2021).
Bagikan

“Pinaka ibu kota provinsi Bali madasar ngukuhang seni budaya pemerintah kota Dènpasar pacang ngwangun icon anyar ring wewidangan Hèritagè margi Gajah Mada, Dènpasar”.

DENPASAR-DiariBali

Nangiang tata palemahan ring wewidangan Pasar Kumbasari, Pasar Badung lan Jalan Gajah Mada Kota Denpasar sanè kalaksanayang Pemkot kota Dènpasar ring warsa 2021 puniki pacang ngamijilang Icon anyar marupa kalih patung sanè mategeh tigang mèter sanè ngambil sesanti “Sang Kala Trisemaya” pacang ngiasin Jembatan ring Heritage margi Gajah Mada, Denpasar.

Indikè punika kabaosang rikala I Nyoman Gede Sentana Putra utawi sanè akrab kasapa Keduk Garage pinaka desainer patung nunggilang daging pikayun majeng Walikota Dènpasar, I Gusti Ngurah Jaya Negara ring Kantor Walikota Dènpasar, Soma Paing Menail (5/7/2021).

Kedux nlatarang wewidangan Hèritagè Gajah Mada pinaka warisan budaya sanè historis ring ibu kota. Majanten patut kalestariang kawèntenannyanè pinaka pidabdab adi utama indik nilai- nilai sejarah peradaban i manusa duk nguni.

Kedux natasang, kalih patung mategeh tiga mèter puniki masesanti “Sang Kala Trisemaya kacritayang Hyang Betara Guru sanè ngamargiang yoga semadi sanè ngepah jiwa pramana dados kekalih metu raris pandita Sang Hyang Dharmajaya sanè kabaos Sang Resi Sidhiwasitadèwa.

Sang Hyang Trisemaya (Brahma, Wisnu, Iswara) sanè ngerasayang ènergi saking Sang Dharmajaya mapikayun wantah Sang Resi Sidhiwasitadèwa sanè jagi pacang ngarusak jagad. Sang Hyang Trisemaya rumasa brangti saha mijil ngawetuang payroadian sanè acreng.

Kalanturang Kedux, patung puniki wantah abstraksi manut daging sastra lontar Siwagama karanjingang karya 3 dimènsi. Pangradana saking Sang Hyang Trisemaya rikala mancerin jagat lan maya pada tetep degdeg kukuh bakuh.

“Pinaka panyegjeg patut maduè daging unteng parilaksana jadma lan pacang prasida nampisin parisolah i manusa ala ulah, ala ujar lan mogbogin, sakadi waranugraha sanè kapicayang Bhatara Guru majeng Sang Kala Trisemaya, kawèntenan puniki pacang kaketusang marupa patung ring jembatan wewidangan margi Gajah Mada Kota Denpasar,” wedar ipun.

Patung puniki pacang nganggèn ornamèn Bali antuk objèk naga nglilit gada. Antuk badong lan siteng kapaduang nganggèn unsur bulun beburon masuku pat dan ula pinaka objèk sanè kakombinasiang antuk ukiran ornamèn Bali. Tiosan punika rom- rom ring ornamèn pacang nganggèn konsèp sirip mina sanè kasusun repetisi kapaduang ukiran Bali.

“Untengnyanè tetep ngambil tèma tradisional pinaka sesuluh karya patung maèstro Bali inggih punika I Gusti Nyoman Lèmpad rikala mangkin kantenang kantun ngiasin daèrah nol kilomèter Dènpasar, kantun maduè nilai- nilai filosofi sanè raket lan majanten ngupapira tata palemahan wewidangan Hèritagè ring Dènpasar,” pidabdabnyanè.

Walikota Dènpasar I Gusti Ngurah Jaya Negara ngicèn aprèsiasi antuk konsèp pawangunan patung puniki. Antuk kawèntenan patung Sang Kala Trisemaya puniki prasida ngawetuang aura sanè luwih ayu saha ngawewehin nilai èstètika lan seni ring wewidangan Heritage margi Gajah Mada. Tios punika, pawangunan patung puniki pinaka upaya ngicènin ruang aprèsiasi majeng seniman seni rupa ring jagat Dènpasar.

“Majanten titiang banget ngicènin apresiasi, wekasan kaptiang kawèntenan patung puniki prasida ngawetuang aura sanè adi utama saha sida ugi ngawewehin nilai èstetika ring wewidangan margi Gajah Mada,” baos Jaya Negara. (Get)