Yatna ! Kasus Positif Covid-19 Nglimbak

Juru Bicara Satgas Penanganan Covid-19 Kota Dènpasar, I Dèwa Gedè Rai
Bagikan

“Upaya nepes jadma sanè padem panglalah gering agung Covid-19 satgas matetegar majeng masyarakat satata yatna. Utamannyanè sanè maderbè pinungkan pamijilan utawi yusa lingsir mangda trepti lan sumanggem nerapang protokol kesèhatan”.

DÈNPASAR-DiariBali

Maweweh kasus Covid-19 mewali ngakèhang ring kota Dènpasar. Manut data resmi rahinanè mangkin kasus positif akèhnyanè 221 diri. Indikè punika, kasus sanè kènak taler maweweh makèh 73 diri. Tiosan punika, kasus sanè lampus mawali nihil.

“Panglimbak kasus sarahina sanè lampus mawali nihil, iraga sareng sami mangda tetep yatna lan trepti prokes, laksanayang pararem rikala penerapan PPKM Darurat,” baos Juru Bicara Satgas Penanganan Covid-19 Kota Denpasar, I Dèwa Gedè Rai,
Wrespati Kliwon Menail (8/7/2021).

Manut data komulatif kasus positif kasurat 16.859 kasus, angka kasembuhan pasien Covid-19 ring kota Denpasar ngantos angka 15.371 diri (91,17 persen), sanè padem 366 diri (2,17 persen) lan kasus aktif sanè kantun polih perawatan makèh 1.112 orang (6,66 persen).

Danè ngaptiang mangda masyarakat sami setata yatna lan nènten lèngah antuk panglimbak kasus rahinanè mangkin. Rikala ngambil karya, patut nerapang protokol kesèhatan saha tetep wahib nglaksanayang uger- uger rikala nerapang PPKM darurat Jawi-Bali. Maweweh malih kawèntenan mutasi Covid-19 antuk varian anyar.

“Sampunang ngirangin kayun yatna, titik titik lèngah mapuara tingkat kasus Covid 19 ring Dènpasar sayan ngamènèkan, piteges ring dija je, mangda yatnanè tetep uratiang antuk taat ring prokes, virus sampun mutasi. Ngawit awuku panguntat kasus sayan ngagengang”. Weweh danè.

Upaya satata kalaksanayang gumanti sida nyokong upaya ngwates wewidangan rèsiko, tingkat penularan sayan ngareredang. Indikè puniki kalaksanayang antuk ngamargiang operasi yustisi protokol kesèhatan, sosialisasi lan edukasi nyabran rahina antuk mobil calling utawi door to door. Saha ngamarggiang panyemprotan disinfektan ring sejabag jagat Denpasar.

Tiosan punika, Pemkot Denpasar taler mautsaha mangda negepin rèalisasi vaksinasi majeng i krama, salanturnyanè vaksinasi pacang ngrauhin para sisia sekolahan sanè mayusa 12-17 warsa.

“Banget pinunas titiang majeng masyarakat mangda setata ngamargiang prokes sanè ketat, rumasuk ring paumahan lan jero wajib nerapang prokes sanè ketat mangda nepes prasida rered klaster ring kulawarga, titiang ngaptiang ida dane sinamian nyarengin nunggilang pikayun pamargi vaksinasi Covid -19,” pidabdab Dewa Rai. (Get)