Kasidian Ratu Niang Sakti
“ Rikala ngamarginin jalan Kumbakarna utawi pasar Wangaya Denpasar nepas ring jembatan sisi kauh, akéh sane kacingak ngaturang sembah pangubakti saha ngaturang rarapan. Pelinggih Ida Ratu Niang Sakti, punika sane lumrah kabaosang para janané kapercaya prasida ngamolihang unteng tetujon sane kaaptiang minakadi jodoh, kesembuhan, keturunan, pekaryan, saha tamba giat (jerawat)”
DENPASAR-DiariBali
Bali pinaka pulo sanè adi luhung wibuh ring kawèntenan budaya, adat, miwah tradisi lan kaunikan sané marupa taksu. Pulau seribu pura kasumbung olih parajana sami. Boya je wargi saking Dènpasar lan pedagang pasar Wangaya sanè jemet ngaturang sembah pangubakti utawi ngaturang rarapan, gatra indik palinggih sanè marupa arca anak lingsir malinggih saha tangan amustikarana sampun kajanaloka ngantos ke mancanegara.
Pemangku pamucuk ring palinggih Ida Ratu Niang Sakti Anak Agung Ngurah Gedè Agung (72) nyritayang indik palinggih Ratu Niang ngawit warsa 1997 duk punika pasemeton puri Jero Kuta pacang nglaksanayang upacara maligia utawi mamukur ring genah punika sanè Kantun embang maselat antuk tukad Badung.
Turah Belanda punika sapannyane sarahina polih amongan nyukat genah sanè pacang kamargiang upakara punika minakadi, genah gambelan, piadnyan, genah pamiosan miwah sajangkepnyanè akèh para pengayah saha nedunang Ida Peranda Bajing saking geria Kesiman kaaksi anak lingsir malancaran ring genahè punika “Icen ida rarapan mangda nènten ngrudek karyane, mangda ida mawali,” baos ida Peranda majeng Turah, Reditè Umanis Merakih (30/5).
Kawèntenan inucap, Turah nlatarang indike punika majeng ring raka ida sanè pinih duur AA Ngurah Oka Juniantara indik kawèntenan kadi asapunika, irika raris metu kayun ida pacang ngwangun palinggih Ida Ratu Niang warsa 18 oktober 1998 sanè kaempon olih pasemetonan puri Jero Kuta.
“Rasa percaya wargi nyansan ngakèhang rikala pamedek sanè nglungsur jodoh ngamolihang jodoh, dagangan sepi dados laris, ngalungsur katurunan ngamolihang katurunan, pakibeh ring kantoran, kulawarga miwah tetujon napi je sanè pikayunin yèning sampun kadulurin manah lascarya sang sanè mapinunas irika karasayang kewentenannyane,” baos dane.
Lantur Turah, sanè tangkil meriki ke palinggih Ratu Niang nènten umat Hindu kèmanten umat tiosan akèh taler sanè rauh minakadi Kristen, Muslim, Budha sanè rauh saking tanah jawi utawi sampun jenek iriki.
“Titiang nènten ngwatesin umat ngaturang sembah pangubakti iriki, titiang ngicènin manut kayun lan bhakti soang-soang,” baosnyanè sada dabdab alon.
Sinar suci taksu sanè kepancerang prasida nudut pikayun para umat, rasa kedeh lan kadaut rauh nangkil ring genah pelinggih ida. Akèh golongan saking makudang jagat rauh pedek tangkil manut daging pikayun miwah prarabdan ida minakadi polisi, guru, para yowana, para sisya, pegawai, pedagang, para norma nglungsur waranugrahan ida iriki.
“Akèh para yowana, pegawai rauh tangkil nglungsur ubad jerawat utawi anggèn nyerahang mua, cukup antuk toya suci sanè kaicèn,” tlatar danè.
Tiosan punika, pelinggih Ratu Niang kawangun taler pelinggih Dèwi Kwam im, Ratu Pantai Selatan, Ratu Gede miwah Lingga Yoni pinaka peyangkep pelinggih tiosan.
Ring sor taler wènten palinggih padma sanè marupa Taman Bèji sanè mapaiketan sareng pelinggih Ratu Niang pinaka genah pasiraman ida. “Cening palinggih nira ring betèn tirtanè luwihing ida peranda ring geria,” baos Turah bisaman ida.
Palinggih punika kasuciang pinaka genah malukat lan nglungsur tamba majeng sanè sungkan ketlantarang antuk Turah. Yadiastun nènten nguncarang japa mantra sakadi pemangku siosan, nanging indik pamargi punika danè setata antar paripurna rikala matetamban. Napi je sanè wènten ring pantaraning parhyangan luirè endut, nyanyad, lekesan, lumut prasida manados tamba sanè luwih utama sanè prasida ngawè seger sanè mapinunas
“Titiang nènten je balian, minab ida sanè ngredana niwakang waranugraha, saluir napi je sanè kaanggèn sarana mabukti sidhi paican ida, baos Turah sanè maderbè putu papat.
Mungguing aci piodalan sanè kalaksanayang ngantos mangkin nemonin purnama sasih sadamala lan ring pura Taman Beji nemonin Buda Kliwon Ugu. Rikala pakibeh sakadi mangkin sanè kabaos pandemi pamedek kantun akèh nangkil antuk prokes manut pakeling saking pemerintah. (Get)