Kampanye ring Karangasem, Koster Sayaga Wangun Shortcut SangHyang Ambu Nglanturang Dermaga Tanah Ampo
KARANGASEM, diaribali.com – Ngawit kampanye putaran kapertama, pasangan Calon Gubernur miwah Wakil Gubernur Bali Koster-Giri nglaksanayang kampanye ring kabupaten sane maderbe jejuluk “Bumi Lahar” Saniscara Pon Wuku Dungulan (28/9) sane kalaksanayang ring tigang titik makadi ring Bale Desa Seraya Kauh, Kec/Kab. Karangasem, ring Gedung Serbaguna Desa Bebandem, Kec. Bebandem saha Piyadnyan Pasek Desa Antiga, Kec. Manggis.
Kampanye pertama puniki pasangan calon gubernur miwah Wakil gubernur Bali Koster-Giri kasarengin pasangan Calon Bupati miwah Wakil Bupati Gede Dana-Nengah Swadi, kajangkepin fraksi PDIP Provinsi Bali miwah Karangasem.
Ri sajeroning sambramawacana ring Desa Antiga, Wayan Koster nunas dukungan majeng krama sami mangda milih pasangan Koster-Giri nomer urut 2 miwah ngamolihang Jayanti pasangan Dana-Swadi ring Pilkada tanggal 27 Nopember sane jagi rauh puniki.
Koster ngawewehin, indik pawangunan infrastruktur ring Karangasem, dane masamaya pacang ngwangun Shortcut Sanghyang Ambu jangkep antuk terowongan. Siosan ring punika, shortcut taler pacang kawangun ring Benira, Kecamatan Abang.
Nenten kalah saih, antuk nyokong perekonomian masyarakat Karangasem, Koster sayaga nglanturang pawangunan dermaga kapal pesiar Tanah Ampo saha ngwangun pelabuhan Amed, sapisanan Amed pinaka kawasan pariwisata pusat pertumbuhan ekonomi Bali timur. “Kawangunnyane Pelabuhan Amed, pacang ngendahang lapangan kerja, nepis kemiskinan, nglimbakang aset saha nyujur program sane lian,” baos dane.
Ri sampune labdakarya ring periode kapertama antuk makudang pawangunan infrastruktur, dane mapikayun pacang nglanturang periode 2 antuk pewangunan saha ngrencana Bali ngantos Bali sane digjaya ring widang ekonomi, adat miwah budaya Bali.
Siosan ring punika, Koster ngaptiang antuk dukungan masyarakat Karangasem, mangda prasida jayanti ring jagat Karangasem, utamannyane ring Kecamatan Manggis kasarengin Dana-Swadi Coblos nomer 2, periode kedua ,” pengaptinyane nunas pengrastiti.
Koster nglanturang, ring periode sane kaping kalih puniki, dane mapikayun ngamargiang pawangunan ring Bali. Ri kanjekan periode sane kapertama antuk sesanti Nangun Sat Kerti Loka Bali, antuk makuh adat-istiadat, ngwangun perekonomian Bali, ekonimi kuat miwah mandiri antuk berdikari kekuatan ekonomi sane wenten ring Bali. “ Karangasem silih tunggil jagat sane ngamijilang sumber perekonomian iraga sareng sami, potensi ring Karangasem luwih utama, madue salak Bali, uyah Bali saha wenten Galian C,” weweh dane.
Jaya ring periode kapertama, Koster mapikayun nglanturang malih ring periode kaping kalih. Kapertama, ngwangun tata parhyangan suci Besakih, infrastruktur, sarana miwah prasarana, kantun akeh sane patut kawangun ring Bali puniki, ring sajebag jagat Bali. Kabaosang sami pasangan bupati/wakil bupati taler walikota sane kausung PDIP madue sesanti sane pateh, mangda Bali kawangun kukuh bakuh terintegrasi, nenten wenten madue pikayun sane kaon, mangda Bali bakuh saha imbang kelod, kaja, kangin, kauh, tengah .
Titiang nyarengin bo ya antuk kayun newek, kelompok, partai politik nanging puniki kewentenan Bali, titiang nunas sami mangda guyub, briuk sapanggul ngulengan pikayun, pilih Koster-Giri nomer 2 miwah Dana Swadi,” pangapti dane.
Ring galang punika taler, Giri Prasta ngawewehin, yening dane kapilih utawi Jayanti sane kasarengin Wayan Koster, dane masemaya pacang ngicenin insentif majeng Jro Mangku. Indike puniki ngicenin pengargan majeng ring Jro Mangku salami puniki wantah madasar manah lascarya ngrastitiang umat serahina ri sada nglaksanayang upacara utawi yadnya. “Astungkara tiang terpilih, insentif pemangku polih,” boas dane kasanggra becik antuk tepuk tangan krama Antiga.
Selanturnyane Koster maosang kewentenan keluhan indik wantuan subak ring Bali, sadurungnyane wantuan subak kaicen 50 yuta. Nanging, duaning covid antuk efisiensi wantuan kawatesin duaning kewentenan pakibeh jagat. Astungkara kahanan Bali sampun degdeg, wantuan mawali pacang kasukserahang 50 yuta per subak. Desa adat dumun kaicen 300 yuta pacang kawewehin malih ngantos 350 yuta. Saha insentif perbekel miwah perangkat desa pacang kawewehin.Red
