Wawali Arya Wibawa Nyihnayasa Insan Kesehatan Puncak HKN Ke-61
Denpasar, diaribali.com –
Mikelingin Puncak Rahina Kesehatan Nasional (HKN) ke-61 ring Dharma Negara Alaya Lumintang, Anggara Umanis Wuku Kuningan (25/11). kacihnayasa olih Wakil Wali Kota Denpasar, I Kadek Agus Arya Wibawa, majeng para insan kesehatan. Ring galah punika, Wawali Arya ngarauhin mangda prasida masikian penghargaan majeng para jayanti wimbakara HKN saha mungkah Sistem Retribusi Digital Puskesmas (SIDIMAS).
Ring acara sane kemargiang, rauh nyarengin Ketua GOW Denpasar Ny. Ayu Kristi Arya Wibawa, Ketua DWP Denpasar Ny. Ida Ayu Widnyani Wiradana, Forkopimda Kota Denpasar miwah para uleman taler ngicen semangat ring pamilet.
Wawali Arya Wibawa maosang HKN wantah momentum ngemargiang refleksi saha nguatang komitmen nyujur masyarakat sane langkung sehat. “HKN puniki dados ajang refleksi. Dados pangeling sane mapikobet indik upaya nguatang layanan sehat ring masyarakat,” baos Wawali Arya.
Salanturnyane, Arya Wibawa nlatarang ngemargiang indik upaya Pemkot Denpasar nguatang layanan primer, saking posyandu, pustu ngantos puskesmas. Upaya promotif miwah preventif dados fokus utama. Tema HKN “Generasi Sehat, Masa Depan Hebat” mapaiketan sareng dinamika Denpasar sane sayan ngalimbak.
“Angayubagia miwah suksma ring para tenaga kesehatan, akademisi, dunia usaha, media miwah kader. Dedikasi nyantosangang fondasi kesehatan masyarakat,” paweweh dané.
Tiosan punika, Kadiskes Kota Denpasar, dr. Anak Agung Ayu Agung Candrawati maosang indik GERMAS utamannyane dados pilar ngewangun kebiasaan hidup sehat. Parikrama HKN, saking Juli dumogi mangkin sane kasarengin 11 puskesmas, faskes swasta, LSM miwah komunitas.
“Kesehatan boya ja indik fasilitias . Sane pinih utama inggih punika budaya hidup sehat ring krama,” tlatar dane
Ring puncak HKN puniki, Pemkot Denpasar ngluncurang SIDIMAS sane dados sistem retribusi puskesmas berbasis cashless. Program puniki kadabdabang prasida nguatang percepatan layanan miwah transparansi pembayaran.
“SIDIMAS dados pangawit digitalisasi layanan kesehatan primer ring Denpasar,” kapuputang Candrawati. (get)