Upacara Mendem Pedagingan, Arya Wibawa: Guyub Cihna Tradisi Kukuh Bakuh
Denpasar, diaribali.com
Wakil Wali Kota Denpasar, I Kadek Agus Arya Wibawa ngarauhin eedan upacara Macaru, Malaspas miwah Mendem Padagingan ring Pura Kawitan Tangkas Kori Agung, Sinawa, Banjar Tatasan Kaja, Desa Adat Tonja, Wraspati Pahing Wuku Dukut (28/8).
Upacara sane mamargi labdakarya puniki taler kasarenign Ketua GOW Kota Denpasar, Ny. Ayu Kristi Arya Wibawa, Plt. Lurah Tonja, Ida Bagus Gede Anumana, miwah para pangempon Pura Kawitan Tangkas Kori Agung, Sinawa, Banjar Tatasan Kaja.
Ri kala punika, Wawali Arya Wibawa nyihna yasa semangat guyub miwah gotong royong wargi sane kacihnayang antuk pamargi yadnyane. Manut dane, guyub I krama wantah cihna kalestarian tradisi taler pamikukuh nilai-nilai budaya Bali.
“Semangat gotong royong miwah manyama braya pinaka spirit kekuatan sane patut kawerdiang. Maka dasar yadnya, bo ye wantah nincapang sradha bhakti majeng ring Ida Sang Hyang Widi Wasa, sakewanten ngukuhang panyamabrayan miwah guyub ring pantaraning masyarakat patut katincapang taler,” baos Arya Wibawa.
Salanturnyane, Wawali Arya Wibawa mapangapti pamargi upacara keagamaan ring Pura Kawitan Tangkas Kori Agung, prasida maphala ayuning kerahayuan, kerahajengan, miwah tata tentrem majeng ring warga makasami.
Tiosan punika, Kelian Pengempon, I Made Bendi Yudha, nlatarang wantah upacara Macaru, Malaspas, miwah Mendem Pedagingan rahina puniki kalaksanayang tepet antuk galah puputnyane pemugaran palinggih Ida Bathara Kawitan.
“Teling ring Rahina Wraspati Pahing Dukut, kalaksanayang upacara Macaru, Malaspas miwah Mendem Padagingan sane dados eedan nyanggra pujawali ring rahina Saraswati sane jagi rauh puniki,” tlatarnyane.
Ipun taler ngaturang parama suksma antuk sapatedun Wakil Wali Kota Arya Wibawa kairing jajaran Pemkot Denpasar sane satata ngicenin pangremba ri kala pamargi upacara ring masyarakat. (get)