Tangkal DBD, Pemkot Denpasar Ngamargiang Fogging 39 Titik

Denpasar, diaribali.com

Pemerintah Kota Denpasar maka jalaran Dinas Kesehatan sayan mautsaha nepis pikobet kasus DBD.  Silih sinunggil antuk ngamargiang Fogging ULV ring 39 titik wewidangan Kota Denpasar selami galah 3 – 29 Oktober. Indike puniki kabaosang olih Kepala Dinas Kesehatan Kota Denpasar,  dr. Anak Agung Ayu Agung Candrawati saking ambara laya, Wraspati Wage Wuku Tolu, (9/10).

“Fogging nganggen mesin ULV puniki kalaksanayang antuk pepaletan nyabran rahina, ngawit galah 03.30 – 06.30, saha kasebar ring pantaraning wewidangan Kota Denpasar. Puniki wantah upaya mangda prasida nawengin nincapnyane kasus DBD,” baos dane.

Tiosan punika, Dinas Kesehatan taler kolaborasi sareng pihak Puskesmas ring soang-soang wewidangan kecamatan sane sayan nincap ngicen edukasi miwah pakeling majeng I krama antuk gerakan 3M plus.

Program miwah gerakan 3M ngantos mangkin, kata dr. Agung Candrawati kantun dados silih tunggil upaya optimal mangda prasida nawengin penyebaran nyamuk DBD ring soang – soang wewidangan.

“ Gerakan makadi nguras saha nawengin genah penampungan toya, taler mendaur ulang barang bekas penampungan toyan sabeh taler kantun kalaksanayang. Duaning indiki puniki sida ngareredang penyebaran jentik nyamuk,” tlatar dr. Agung Candrawati.

Pidabdab I krama, taler dahat kaaptiang rikala nepis pencegahan penyebaran kasus DBD puniki. Duaning pamargi puniki prasida mutus siklus idup nyamuk, makasami kalangan masyarakat prasida dados pamucuk.

“Titiang mapikeling majeng ring krama sami, mangda sida daddos pamucuk saha sinarengan merangin penyebaran jentik nyamuk DBD puniki,” dane muputang. (get)