Sekda Alit Wiradana Ngupasaksi Karya Melaspas Miwah Padudusan Alit Pura Mekah Desa Pekraman Pohgading

Denpasar, diaribali.com
Sekretaris Daerah Kota Denpasar, IB Alit Wiradana ngupasaksi Karya Melaspas miwah Padudusan Alit ring Pura Mekah, Br. Binoh Kaja, Desa Pekraman Pohgading, Kecamatan Denpasar Utara, Wraspati Kliwon Wuku Warigadean (3/4).

Taler kasarengin Anggota DPRD Kota Denpasar, I Nyoman Gede Sumara Putra, Perbekel Desa Ubung Kaja, I Wayan Astika serta krama pengempon Pura Mekah, Br. Binoh Kaja, Desa Pekraman Pohgading.

Sekda IB Alit Wiradana maosang, upacara Melaspas miwah Padudusan Alit puniki silih tunggil nincapang rasa sradha bhakti umat Hindu majeng ring linggih Ida Sang Hyang Widi Wasa.

Dane ngaptiang sesampunne kalaksanayang Upacara Melaspas miwah Padudusan Alit puniki makasami umat utamannyane penyungsung kalih pengempon mangda sayan nincapang rasa penyamabraya miwah ngarumaketang majeng sesamen umat.

“Majanten parikrama yadnya puniki pinaka sarana nincapang nilai spiritual pinaka umat beragama. Titiang mapangapti riwekas upacara yadnya prasida mikolihang energi positif sane prasida nyunarang pamargi sane luwih ayu majeng umat bilih- bilih prasida nyomia kahanan sane nenten becik ring wewidangan desa puniki,” baos IB Alit Wiradana.

Ring galah punika Penglingsir Pura, I Nyoman Sudana nlatarang pamargi karya puniki puputnyane pamargi renovasi raab Palinggih Ratu Gede. Tiosan punika, parikrama karya puniki matetujon mangda jagate sayan degdeg dayuh tumeduh miwah nyomia kahanan sane kaon sane sida ngusak asik kauripan i manusia, utamannyane pengempon miwah krama Pura Mekah mangda sida ngulati kauripan sukerta miwah santi.

“Ngaptiang puputnyane renovasi saha pamargi Karya Melaspas miwah Padudusan Alit ring Pura Mekah puniki riwekasan prasida ngrajegang miwah ngawerdiang bhuana agung kalih bhuana alit, taler pinaka rasa pangayubagia dumogi setata kaicen panuntun urip rikala ngalaksanayang pangayah-ayahan,” atur Nyoman Sudana. (Hmd/get)