Pemkot Ngrencana Wangun SJUT
Denpasar, diaribali.com
Pamerintah Kota Denpasar pacang ngrencanayang pawangunan Sarana Jaringan Utilitas Terpadu (SJUT) pacang midabdabin kabel fiber optik ring ruas margi sane wenten ring Kota Denpasar. Tiosan indik kaasrian saha kasutreptian krama Denpasar, unsur estetika wajah Kota Denpasar taler pidabdab utama program puniki.
Indike puniki kasobiahang ri kala paruman koordinasi persiapan pawangunan SJUT Kota Denpasar sane kapimpin olih Walikota Denpasar, I Gusti Ngurah Jaya Negara, Wrespati Wage Wuku Bala (2/1) semeng.
Ring galah punika taler kasarengin Sekretaris Daerah Kota Denpasar Ida Bagus Alit Wiradana, Direktur Utama Perumda Bhukti Praja Sewakadarma, I Nyoman Putrawan, Pimpinan OPD Kota Denpasar miwah pihak tiosan.
Walikota Denpasar, I Gusti Ngurah Jaya Negara maosang masterplan indik pawangunan SJUT punika ring galahe becik puniki sampun ngranjing tahapan persiapan. Pamargi masterplan punika ngenenin indik penataan kabel fiber ring makudang ruas utama Kota Denpasar. Silih tunggilnyane, kawasan wisata Sanur sane pinaka ikonik Kota Denpasar.
“Titiang mapangapti masterplan sane sampun kasusun, tata-titi kabel fiber optik ring Kota Denpasar prasida kalaksanayang mangda janten becik. Kawasan wisata Sanur, silih tunggilnyane ring margi Danau Tamblingan wantah pinih utama ri kala proyek SJUT puniki,” baos Walikota Jaya Negara.
Pawangunan SJUT puniki, lantur Walikota Jaya Negara karasa patut kalaksanayang mangda nginkinang penataan kabel fiber sane durung becik selami puniki ngranayang osek yening kantenang olih kramane, utamanyane ri kala ring margi. Antuk punika, ri sajeroning paridabdab puniki, kajian saking makudang pangrencana patut kalaksanayang mangda prasida raris pawangunan SJUT puniki memargi antar kawekas.
” Ri sajeroning pamargi, pawangunan SJUT puniki majanten pacang mapikobet ring widang sosial miwah palemahan. Antuk punika, kajian puniki kaaptiang, mangda pawangunan SJUT puniki prasida becik kalaksanayang,” baos Jaya Negara.
Tiosan punika, Jaya Negara taler ngawewehin, Rikala mangkin Pemkot Denpasar nyiagayang regulasi sane pacang nyantenang para provider pacang nedunang kabel fiber padrebe dane ke SJUT sane sampun kasiagayang olih Perumda Bhukti Praja Sewakadarma. Ring galah nampek puniki, regulasi punika pacang kamijilang ring Peraturan Walikota saha kawekas kamargiang antuk Peraturan Daerah.
” Pemkot Denpasar ngaptiang saha nyantenang para provider pacang nedunang kabel fiber Ke SUJT, dadosnyane nenten wenten malih kabel fiber sane nenten becik yening kantenang,” teges Jaya Negara.
Dirut Perumda Bhukti Praja Sewakadarma I Nyoman Putrawan ring galahe punika maosang indik pamargi, pawangunan SJUT puniki pacang kalaksanayang olih infrastruktur bawah tanah sane lumrah kabaos ducting. Perumda Bhukti Praja Sewakadarma, ring galah puniki kasudi pinaka leading sector proyek puniki kasarengin tenaga ahli ring widang pangrencana, pengadaan miwah teknologi komunikasi.
” Dadosnyane tenaga ahli puniki taler pacang ngremba ri kala ngrencanayang, penyusunan teknis kreteria pengadaan miwah sane tiosan. Titiang mangupaya mangda proyek pawangunan SJUT puniki prasida gelis kamargiang ring warsane mangkin,” baos Nyoman Putrawan. (Get)