Pemkot Denpasar Nglaksanayang Diseminasi Kelitbangan Warsa 2025
Denpasar, diaribali.com
Pemerintah Kota Denpasar antuk Badan Riset miwah Inovasi Daerah Kota Denpasar nglaksanayang Diseminasi Kelitbangan warsa 2025 sane kapungkah olih Sekretaris Daerah Kota Denpasar, Ida Bagus Alit Wiradana sane kacihnayang suaran Gong ring Graha Sewaka Dharma, Denpasar, Wraspati Paing Wuku Kulantir (6/3).
Diseminasi kelitbangan wantah parikrama utama mangda sayan ngalimbakang hasil penelitian sane prasida nyokong efektivitas kebijakan miwah pawangunan daerah.
Rikala pemungkah punika kalaksanayang taler panyukserahan 4 sertifikat narasumber miwah moderator olih Sekda Kota Denpasar, Ida Bagus Alit Wiradana kasarengin Kepala Brida Kota Denpasar I Made Pasek Mandira.
Ida Bagus Alit Wiradana maosang ring sambrama wacananyane, makudang pikobet sane wenten ring Kota Denpasar wantah pikebot sareng sami mangda prasida ngamanggihin panepis sane becik saha prasida paigum sareng sami makadi pamerintah, akademisi, palaku bisnis, masyarakat miwah media.
Salanturnyane, panepis pamargi majanten antuk riset, antuk punika Badan Riset miwah Inovasi Daerah Kota Denpasar pinaka lembaga sane berperan ri sajeroning pamargi kelitbangan utawi riset sampun karemba nglaksanayang pengkajian ngantos ngamijilang penepis pikobet ring Kota Denpasar. Kapungkur rekomendasi miwah kebijakan strategis ring Kota Denpasar”, baos dane.
Sekda Alit Wiradana nyihna yasa saha mapangapti parikrama kelitbangan puniki prasida sayan nincap saha berkolaborasi ngulatiang hasil kalitbangan mangda prasida katawengin becik antuk krama sareng sami, ngantos prasida ngwangun ruang kreativitas miwah inovasi sane becik efektif miwah efisien ngulati Kota Denpasar sane kreatif miwah masesanti budaya.
Kepala Balitbang Kota Denpasar, I Made Pasek Mandira taler pinaka Ketua Panitia nlatarang, parikrama Diseminasi Kelitbangan warsa 2025 ngambil sesanti ‘Bergerak Bersama Membenahi dan Menggali Potensi Kota, Menuju Denpasar Maju’. Miwah ri sajeroning pamargi dane makriya sinarengan majeng makudang peneliti sane terafiliasi majeng lembaga Penelitian Pengabdian Masyarakat saking Universitas Udayana, Undiknas miwah UNHI.
Ring galah punika taler kabaosang, makudang kajian sane sampun kalaksanayang ring warsa 2024 pacang diseminasiang ring galah mangkin akehnyane tigang kajian makadi kajian mitigasi kebencanaan ring Kota Denpasar, identifikasi kendala miwah permasalahan dalam optimalisasi penanganan kemacetan lalu lintas di Kota Denpasar, miwah identifikasi ikan mas koki Bali berdasarkan karakter miwah genetik ring Kota Denpasar.
“Majanten parikrama Desiminasi Kelitbangan puniki matetujon ngalimbakang hasil-hasil kelitbangan sane kalaksanayang antuk parikrama pengkajian ring warsa 2024 , sane dados pangapti prasida nyokong pawangunan miwah efektivitas kebijakan Pemkot Denpasar kawekas”, baos Pasek Mandira. (get)