Mikelingin Wanti Warsa Kota Denpasar ke- 237, Sinergi Pemkot miwah Pemprov Sokong Pawangunan
Denpasar, diaribali.com
Mikelingin wanti warsa ke-237 Kota Denpasar kalaksanayang ring Lapangan Lumintang, Wraspati Kliwon Wuku Ukir (27/2). Pinaka inspektur Upacara ring apel mikelingin parikrama inggih punika, Gubernur Bali, I Wayan Koster.
Ring galahe punika kasarengin, Walikota Denpasar I Gusti Ngurah Jaya Negara, Wakil Walikota Denpasar, I Kadek Agus Arya Wibawa, Ketua DPRD kota Denpasar, I Gusti Ngurah Gede, Sekretaris Daerah Kota Denpasar, Ida Bagus Alit Wiradana, jajaran Forkompinda Kota Denpasar, miwah uleman tiosan.
Tiosan punika taler kasarengin uleman VIP Ketua TP PKK Kota Denpasar, Ny. Sagung Antari Jaya Negara, Ketua Gatriwara Kota Denpasar, Ny. Purnawati Ngurah Gede, Ketua GOW Kota Denpasar, Ny. Ayu Kristi Arya Wibawa, Ketua DWP Kota Denpasar, Ny. Ida Ayu Widnyani Wiradana, tokoh agama, tokoh puri, akademisi, budayawan, miwah sane tiosan.
Parikrama apel mikelingin punika kalanturang antuk panganugrahan Satya Lencana Karya Satya majeng pegawai sane sampun makerti yasa ngawit 10 warsa, 20 warsa miwah 30 warsa sane kasematang olih Gubernur Bali I Wayan Koster kasarengin Walikota Denpasar, I Gusti Ngurah Jaya Negara.
Gubernur Bali, I Wayan Koster ri sajeroning sambrama wacana ngucapang Rahajeng mikelingin wanti warsa Kota Denpasar ke 237. Sane pinaka Ibu Kota Provinsi Bali. Kabaosan wajah Kota Denpasar wantah mahkota Bali. Kawentenan sane becik utawi pikobet sane wenten ring Kota Denpasar taler pikobet Provinsi Bali.
“Ngangganin Pemerintah miwah krama Bali, titiang ngucapang Rahajeng wanti warsa Kota Denpasar sane ke-237. Pawangunan Kota Denpasar majanten silih tunggil pangrencana pawangunan Provinsi Bali, mikukuhin nilai Nangun Sat Kerti Loka Bali,” Baos Gubernur Wayan Koster.
Makudang pidabdab miwah pangrancana ngwatesin pikobet ring Kota Denpasar taler pacang kaparidabdabang olih Pemerintah Provinsi Bali. Salih tunggilnyane rencana Infrastruktur marupa pawangunan margi sane mapangancan Denpasar miwah Badung, sane kaaptiang pacang nepis kemacetan sane sayan karasayang ring makudang titik.
Tiosan punika, Gubernur Wayan Koster taler nyokong mangda Kota Denpasar taler prasida nyiagayang UMKM miwah nangiang ekonomi kreatif, miwah ngalimbakang digitalisasi ring makudang widang, antuk punika sumingkin akeh prasida nyanggra panglimbak ring era globalisasi sakadi mangkin.
“Sinergitas dahat kaaptiang mangda prasida makasami program tumus. Antuk punika, Pemerintah Provinsi Bali sayaga nyokong miwah kriya sinarengan majeng Pemerintah Kota Denpasar mangda sami pawangunan prasida mamargi antar,”teges Gubernur Wayan Koster.
Ring galahe punika, Walikota Denpasar I Gusti Ngurah Jaya Negara maosang mikelingin wanti warsa Kota Denpasar pinaka parikrama nyabran warsa sane kalaksanayang patut kelingan sareng sami, ring galah sane lintang, naenin ngamedalang jargon Kota Denpasar, inggih punika pinaka “Kotaku,Rumahku”, anggen dasar nangiang rasa loyalitas krama mangda sida rumasa nuenang kotane puniki.
Majanten ring galah mikelingin wanti warsa ke-237 puniki, mijil sesanti “Bergerak Bersama Menuju Denpasar Maju” sane mapangapti pacang ngamijilang spirit partisipasi aktif krama Kota Denpasar rikala ngwangun sane madasar antuk Vasudhaiva Kutumbhakam.
“Pemerintah Kota Denpasar pacang ngupaya nepis pikobet leluu, kemacetan miwah infrastruktur, banjir, punika taler pendidikan miwah kesehatan. Titiang nunas pangrastiti miwah sokongan krama miwah elemen sami mangda prasida nyujur Kota Kreatif Berbasis Budaya Menuju Denpasar, Aman, Jujur miwah Unggul ( MAJU),” baos Walikota Jaya Negara. (get)