“Menyapa dan Berbagi”, TP PKK Kota Denpasar Nyerahang 267 Paket Wantuan
Denpasar, diaribali.com
Pemerintah Kota Denpasar kasarengin Tim Penggerak PKK Kota Denpasar nyukserahang 267 paket wantuan majeng krama lansia, ibu hamil, balita, ring kalih kecamatan, makadi Denpasar Utara miwah Denpasar Barat, Wreaspati Kliwon Wuku Kelawu (21/8). Parikrama puniki karincikang “Menyapa dan Berbagi PMT” silih tunggil upaya nepis kahanan kirang Energi Kronis (KEK) ring Kota Denpasar.
Kalih genah sane matiosan, inggih punika Kantor Desa Pemecutan Kaja, Denpasar Utara miwah Banjar Pekandelan, Pemecutan Kelod Denpasar Barat, paket wantuan luire taluh, susu, buah, daging ayam, miwah biskuit punika kaserahang olih Sekretaris I TP PKK Kota Denpasar, Ny. Ayu Kristi Arya Wibawa kasarengin Ketua Pokja IV TP PKK Kota Denpasar, Ny. Ida Ayu Widnyani Wiradana.
Sekretaris I TP PKK Kota Denpasar, Ny. Ayu Kristi Arya Wibawa maosang, TP PKK Kota Denpasar sampun makriya sinarengan majeng Pemerintah Kota Denpasar ngutsahayang upaya pammargi antisipatif rikala nepis kawentenan kahanan stunting miwah pencegahan kahanan KEK ring Kota Denpasar.
Ayu Kristi taler mapangapti wantuan pamargi Menyapa dan Berbagi sane kaicen puniki prasida kaanggen jatu saha prasida mawiguna majeng I krama sane ngaptiang, utamannyane ring wewengkon Denpasar Utara miwah Denpasar Barat.
“Wantuan PMT sane icen titiang puniki makadi makudang bahan pangan bergizi, manut pangapti makudang-kudang kelompok sane nerima,” baos Ayu Kristi.
Salanturnyane, tiosan parikrama menyapa dan berbagi, utsaha tiosan taler kalaksananayang antuk ngawentenang parikrama Posyandu, pinaka layanan dasar kesehatan sane katuju manut segmen yusa.
“Titiang saking TP PKK Kota Denpasar ngaptiang majeng para warga mangda sayan ngawigunayang becik layanan Posyandu, tiosan punika sida mendeteksi pangawit kesehatan, taler prasida kaanggen patitis pikobet stunting,” baos Ayu Kristi.
Ring galahe punika, Camat Denpasar Utara, Wayan Yuswara, ngaturang parama suksma majeng Pemerintah Kota Denpasar maka miwah TP PKK Kota Denpasar antuk wantuan sane kaicen majeng ring para warga.
“Matur Suksma majeng TP PKK Kota Denpasar sane sampun setata ngrauhin saha mapaica majeng I Krama utamanyane kelompok rentan. Parikrama puniki dahat ngwantu rikala nincapang gizi miwah nawengin pikobet stunting,” tlatar dane. (get)