Jaya Negara Mimpin Rakor Lintas Sektor Ngardi Denpasar Sutrepti
Denpasar, diaribali.com
Wali Kota Denpasar, I Gusti Ngurah Jaya Negara mimpin Rapat Kordinasi Lintas Sektor sane kalaksanayang ring Graha Sewaka Dharma Wreaspati Wuku Watugunung (4/9). Parikrama punika kadabdabang nyantenang kasutreptian Kota Denpasar ri kala aksi unjuk rasa ring makudang titik.
Parikrama punika taler kasarengin Wakil Wali Kota Denpasar, I Kadek Agus Arya Wibawa, Ketua DPRD Kota Denpasar, I Gusti Ngurah Gede, Dandim 1611 Badung, Kolonel Inf. I Putu Tangkaas Wiratawan, Kapolresta Denpasar, Kombes Pol. Mohhamad Iqbal Simatupang, Kajari Denpasar, Agus Setiadi, panyeledi Pengadilan Negeri Denpasar, miwah Sekda Kota Denpasar.
Ring galahe punika, Wali Kota Denpasar, I Gusti Ngurah Jaya Negara nyihna yasa majeng TNI/Polri, Desa Adat utamannyane Pecalang, taler Perbekel/Lurah sane satata siaga nyaga kasutreptian ring wewidangan soang-soang. indike puniki yihnayang guyub ri sajeroning makasami lapisan miwah pemangku kepentingan ring Kota Denpasar.
“Lugrayang titiang, nganggganing Pemerintah Kota Denpasar ngucapang suksma majeng makasami pihak, ngantos aksi ngamedalang pikayunan mamargi antar , yadiastun ring silih tunggil titik merluang rencana prebea,” baos dane.
Jaya Negara ngaptiang, soliditas miwah kordinasi sane sampun mamargi becik puniki katincapang malih. Indike puniki pinaka tantangan sane jagi rauh sayan sayan ingkup. Setata yatna miwah memitigasi nepesin kawentenan kahanan patut kasanggra becik.
“Pangaptin titiang guyub saha nunggalan pikayun sane sampun becik puniki mangda tetep katincapang ri kala ngardi kasutreptian miwah kasukertan ring pantaraning wewidangan utamannyane Kota Denpasar,” baos dane ngaptiang.
Kapolresta Denpasar, Kombes Pol. Mohhamad Iqbal Simatupang rikala punika nyantenang ring galahe puniki kahanan ring Kota Denpasar sampun sayan trepti. Nanging patut katawengin becik mangda sayan sukerta santi Kota Denpasar puniki.
“Tetujon iraga sami tunggil, kita cinta damai, sahananing pangrencana ri kala ngawedarang pikayun utawi aspirasi dahat kaaptiang, sakewanten mabuat majeng ring iraga sami mangda ngardi sukerta santi. Titiang nyihna yasa Pecalang sane ngamiletin mikukuhin kasutreptian ring Denpasar puniki ,” baos dane. (Get)