Jaya Negara-Arya Wibawa Kakukuhang, Murdaning Jagat Denpasar Periode Kalih
Jakarta,diaribali.com
WaliKota Denpasar I Gusti Ngurah Jaya Negara miwah Wakil Walikota I Kadek Agus Arya Wibawa sane pinaka Walikota miwah wakil Walikota Denpasar kapilih kakukuhang olih Presiden RI, Prabowo Subianto ring Istana Negara, Jakarta Wraspati Pon Wuku Landep (20/2).sausan nguncarang sumpah jabatan pinaka Walikota miwah Wakil Walikota Denpasar. Pasangan sane ketah kabaos paket Jaya-Wibawa puniki sah pinaka murdaning ibu kota Provinsi Bali, Kota Denpasar periode sane kaping kalih inggih punika 2025-2030.
Parikrama pangukuhan kakawitin antuk pidabdab ring Kawasan Monumen Nasional. Selanturnyane, para kepala daerah ngamiletin kirab nyujur Istana Negara. Bupati miwah wakil bupati kasarengin walikota miwah wakil walikota kakukuhang manut Kepmendagri Nomor 100.2.1.3 – 221 warsa 2025 miwah Nomor 100.2.1.3 – 1719 warsa 2025 indik pangesahan pengangkatan Kepala Daerah miwah Wakil Kepala Daerah ring Kabupaten miwah Kota Hasil Pemilihan Kepala Daerah Serentak Warsa 2024 Masa Jabatan warsa 2025-2030.
Presiden RI, Prabowo Subianto maosang pangukuhan sane kalaksanayang sinamian pinaka momen bersejarah ring pamerintahan Indonesia. Indike puniki nyihnayang bangsa Indonesia pinaka bangsa pinih agung madue demokrasi sane sayan ngalimbak.
“Semeton sami yening kamanah puniki momen bersejarah sane ngawitin ring negara puniki, prasida ngukuhang 33 gubernur, 33 wakil gubernur, 363 bupati, 362 wakil bupati, 85 wali kota, 85 wakil wali kota makasami 916 kepala daerah saking 481 daerah kakukuhang sinamian ring Istana Merdeka olih Kepala Negara,” Baos Prabowo rikala ngicen sambrama wacana.
Selanturnyane, Kepala Negara negesang majeng kepala daerah indik amongan miwah tanggung jawab pinaka pelayan krama. Presidan maosang para kepala daerah mangda mabela ring krama miwah nindihin mangda prasida nincapang kauripan kramane.
“Puniki wantah amongan iraga sareng sami. Yadiastun mawit saking partai sane matiosan, saking agama sane matiosan, saking suku sane matiosan, sakewanten ida dane mijil ring pantaraning kulawarga ageng nusantara, kulawarga Republik Indinesia, kulawarga ageng Mera Putih, kulawarga ageng Bhineka Tunggal Ika, matiosan sakewanten tunggil,” teges Prabowo.
Presiden Prabowo ngawewehin makasami kepala daerah pacang kacunduk malih ring parikrama retreat sane kalaksanayang olih Menteri Dalam Negeri ring Magelang, Provinsi Jawa Tengah. Presiden taler mikelingin mangda sayaga ngamiletin pamargi punika.
Kacunduk ri wusan pangukuhan, Walikota Denpasar, I Gusti Ngurah Jaya Negara kasarengin Wakil Walikota Denpasar Kadek Agus Arya Wibawa maosang ring periode kaping kalih puniki dane pacang kerja keras mangda prasida nawengin pikobet ring Kota Denpasar.
“Titiang pacang nglanturang napi sane dados program sadurungnyane ngantos pawangunan prasida kalaksanayang holistik, berkelanjutan miwah berkemanfaaatan, puniki pinaka petitis Kota Kreatif Berbasis Budaya Menuju Denpasar Maju (Makmur, Aman, Jujur dan Unggul),” baos dane.
Salanturnyane kabsosang, ri kala nglanturang pawangunan, Jaya Negara sayaga masikian, indike puniki kaanggen nyokong pawangunan miwah optimalisasi nampenin pikobet ring Kota Denpasar.
” Kolaborasi miwah Sinergitas pinaka dasar rikala nincapang pawangunan, program kerja sane sampun karincikang pacang sayan kaoptimalang miwah katunggilang, silih tunggilnyane makasami elemen miwah stakeholder ring Kota Denpasar,” baosnyane. (Hbd/db).