ASN Ngantos TNI Polri Mareresik Bencana Blabar Agung

Denpasar, diaribali.com

Makasami elemen masyarakat mautsaha nyokong optimalisasi nawengin pasca bencana nibenin Kota Denpasar. Luire, Aparatur Sipil Negara (ASN) ring widang Pemerintah Kota Denpasar ngantos TNI miwah Polri guyub nyokong ngaresikin sisan bencana blabar ring Kota Denpasar. Wraspati Umanis Wuku Sinta (11/9).

Pamargi aksi mareresik puniki kasarengin Danrem 163 Wirasatya, Brigjen Ida Idewa Agung Hadi Saputra, Wali Kota Denpasar, I Gusti Ngurah Jaya Negara, Wakil Wali Kota Denpasar, I Kadek Agus Arya Wibawa miwah Sekda Kota Denpasar, Ida Bagus Alit Wiradana. Aksi mareresik puniki kamargiang ring pantaraning Heritage Gajah Mada  miwah ring weweidangan bantaran tukad Badung. Tiosan punika, taler kelaksanayang evakuasi pembugaran wangunan sane keni bencana blabar.

Wali Kota Denpasar  I Gusti Ngurah Jaya Negara maosang bencana blabar ring Denpasar ri kala mangkin wantah nyisaang tumpukan nyanyad miwah leluu. Duaning punika, majalaran nyokong prasida mawali ka jati mula pasca bencana, kalaksanayang aksi mareresik.

“Rahinane mangkin makasami nglaksanayang aksi mareresik, ngantos ring wewidangan sane keni iyusan prasida kaanggen mawali malih olih I krama, utamannyane Pasar Badung miwah Pasar Kumbasari ngantos plataran tiosan sane keni iyusan blabar,” baos dane.

Kabaosang, ri kala mangkin Pemerintah Kota Denpasar sampun ngukuhang status Tanggap Darurat Bencana Banjir. Indike punika prasida nyokong optimalisasi upaya penanganan pasca bencana miwah pemulihan plataran blabar.

“Dumogi antuk gerakan miwah guyub sinareng sami ngawit ASN miwah TNI Polri puniki gelis prasida nawengin miwah plataran punika prasida kaanggen mawali malih ngrereh pangupa jiwa majeng ring kramane makasami,” weweh dane. (get)