Jaya Negara Nyihna Yasa Aksi Sosial Parikrama HUT ke-28 Perumda Tirta Sewakadarma
Denpasar, diaribali.com
Wali Kota Denpasar, I Gusti Ngurah Jaya Negara nyihna yasa Aksi Sosial sane kalaksanayang parikrama HUT kaping 28 Perumsa Air Minum Tirta Sewakadarma Kota Denpasar. indike punika kabaosang ritatkala ngrauhin Aksi Sosial Donor Darah, yukserahang Wantuan Kursi Roda, Walker miwah Sembako sane kalaksanayang ring Gedung Dharma Negara Alaya Denpasar, Wraspati Pahing Wuku Tambir (19/6).
Acara punika taler karauhin Wakil Wali Kota Denpasar, I Kadek Agus Arya Wibawa sane pinaka Ketua PMI Kota Denpasar, Sekda Kota Denpasar, Ida Bagus Alit Wiradana. Tiosan punika taler kasarengin Ketua GOW Kota Denpasar, Ny. Ayu Kristi Arya Wibawa, Pimpinan OPD miwah uleman tiosan.
Wali Kota Denpasar, I Gusti Ngurah Jaya Negara, ngucapan cihna yasa indik pamargi Aksi Sosial Donor Darah, Panyukserahan Kursi Roda miwah Walker, taler wantuan Sembako sane kalaksanayang pamargi HUT ke-28 Perumda Air Minum Tirta Sewakadarma Kota Denpasar. Dane maosang acara puniki dahat utama pisan sane prasida ngawantu i krama miwah prasida mapikukuh rasa menyama braya ring pantaraning kauripan.
“Malarapan acara kadi puniki, iraga sareng sami sida ngardi semangat Vasudhaiva Kutumbakam, sane madue sesanti kita semua adalah bersaudara. Titiang ngaptiang makasami jajaran ring pantaraning Pemerintah Kota Denpasar prasida nincapang program-program sane ngingilang i krama, antuk punika iraga sareng sami prasida nyujur kauripan sutrepti miwah santi ring Denpasar,” baos Jaya Negara.
Wali Kota Jaya Negara taler mapangapti mangda parikrama kadi asapuniki prasida dados imba majeng instansti tiosan mangda setata eling majeng ring sesamen manusa. Antuk punika, Denpasar prasida dados kota sane jagaditha miwah kerta raharja manut Visi Kota Kreatif Berbasis Budaya Menuju Denpasar Maju.
“Iraga sareng sami maderbe tanggung jawab setata ngawantu miwah saling sokong, majanten kota Denpasar sayan bergerak maju manut sesanti Kota Kreatif Berbasis Budaya Menuju Denpasar Maju,” paweweh dane.
Tiosan punika, Dirut Perumda Air Minum Tirta Sewakadarma Kota Denpasar, I Putu Yasa nlatarang parikrama Bulan Bung Karno ke-7 miwah Hari Ulang Tahun Perumda Air Minum Tirta Sewakadarma ke-28, taler nglaksanayang makudang acara miwah bakti sosial. Parikrama puniki prasida mamargi taler kasokong kriya sinarengan PMI, Dinas Sosial miwah OPD ring Kota Denpasar.
“Jajaran Perumda Air Minum Tirta Sewakadarma memanah berbagi kasih majeng masyarakat sane ngaptiang rah miwah para lansia.
Dumogi parikrama puniki wenten pikenohnyane majeng ring krama utamannyane ring Denpasar,” tlatar dane. (Get)